我的眼皮每天瞓醒都不同，有時雙有時內雙，有時臨瞓前飲水太多起身眼超腫，所以基本上每朝都要貼雙眼皮膠紙矯眼balance返。矯眼最怕係條膠紙露左出黎，係人都見到你痴左膠紙係何其尷尬！作為一個有10＋年經驗既用家，今次除左會點評6款雙眼皮膠紙，仲會分享特幼無痕單變雙小撇步，試過條膠紙隱形到去做facial時，美容師洗完面都發現唔到 😂

今次揀左呢6款膠紙點評，分別為

• 3M卷裝美目貼
• Shishida Seishindo eyetape (下稱SS eyetape)
• Prudor膚色單面美目貼
• D-up膚色單面美目貼
• D-up透明雙面美目貼
• 網狀隱形雙眼皮貼

基本上單面雙眼皮貼建議搽護膚品前就要貼，護膚品同化妝品都會影響膠紙的黏性導致容易飛起穿崩；而雙面既就化完妝先貼，妝前貼會食實眼影形成一撻撻

由於單面膠紙要妝前貼，所以為頭4款單面膠紙影返上眼影後既對比，comment留返下面講~

——————————————————————————————

3M卷裝美目貼

厚薄度 ★★★★★

無痕度 ★★★★☆

方便度 ★★★☆☆

推薦度 ★★★★★

Comment﹕卷裝膠紙要自己剪有d麻煩，但勝在可剪到啱自己既長度同幼度，加上幼細磨砂面搽左眼影都唔覺眼，持久度高防油力強，用左全日都唔易現形！

——————————————————————————————

SS eyetape

厚薄度 ★★★☆☆

無痕度 ★★☆☆☆

方便度 ★★★★★

推薦度 ★☆☆☆☆

Comment﹕已經預先裁好形狀，一撕即貼其實好方便，膠紙本身唔算厚身但形狀偏粗，所以素顏用眨眼時都會見到，最大缺點係呢隻完全唔上眼影色，貼完先化會留白一片怪到一個點，但化左眼影才貼又黏性大減現哂形，呢款雖然好平但唔會推薦

——————————————————————————————

Prudor膚色單面美目貼

厚薄度 ★★★★☆

無痕度 ★★☆☆☆

方便度 ★★★★☆

推薦度 ★★★☆☆

Comment﹕呢款素顏用的話真係充滿喜感，無論開眼定閉眼都穿哂崩，加上眼皮可能有油脂令膠紙痴唔實有d反白，痴前確保眼皮乾爽應該會好d。佢既好處係好上眼影色，搽左眼影反而無咁穿崩，建議用前將膠紙既形狀自己剪幼小小再貼效果應該唔錯

——————————————————————————————

D-up膚色單面美目貼

厚薄度 ★☆☆☆☆

無痕度 ★★☆☆☆

方便度 ★★★★★

推薦度 ★★☆☆☆

Comment﹕4款單面眼皮貼入面最厚，素顏用都扼得下人，但上妝後問題同SS eyetape一樣，唔推薦比要化妝既人

——————————————————————————————

D-up透明雙面美目貼

厚薄度 ★★★★☆

無痕度 ★★★★☆

方便度 ★★★★☆

推薦度 ★★★★☆

Comment﹕貼完用叉推上去已輕易做到深邃雙眼皮，呢款既缺點係膠紙食實左眼皮，有機會對眼會合唔埋都幾搞笑；雙面美目貼比較適合完全單眼皮或眼皮條線唔夠深想痴明顯d既人，內雙想貼高d其實用單面更加方便快捷

——————————————————————————————

網狀隱形雙眼皮貼

厚薄度 ★★★★☆

無痕度 ★★★★☆

方便度 ★★☆☆☆

推薦度 ★★★★☆

Comment﹕幫客人用多數用網網，因為隱形效果好又夠持久，單面或者雙面用都得，雙面既貼完用叉推上去可以將眼皮痴起，基本上咩眼形都啱用，最重要係等膠水乾左之後仲可以加眼影色補妝；缺點係本身好大塊要剪細先fit返眼形，搽膠水等乾都需時，新手仲可能會搞到痴林林

——————————————————————————————

結論，平時用我絕對會推薦3M卷裝美目貼，呢隻係我日日用既膠紙，去旅行要第一時間執呢卷膠紙同鉸剪入喼，唔敢想像無帶既後果！D-up透明雙面美目貼同網網都好用，不過使用時有d麻煩，但效果都夠持久自然。

＊＊無痕單變雙小撇步＊＊

很多人問到底點先可以剪到卷狀膠紙咁幼，其實大家都比膠紙既形狀規範左，總覺得要剪到圓弧形咁，其實剪一條幼幼既長方形一樣可以痴起眼皮，將膠紙貼近鉸剪邊緣剪落去就得，勁易之餘上到眼又可adjust，痴高痴低任你話事

另一個FAQ，雙眼皮係咪想痴幾高都得？非也，太貪心痴太高膠紙有機會唔夠力反返出黎弄巧反拙！尤其內雙眼皮既人痴網網膠紙時，膠紙底部要cover到你本身既眼皮線，膠紙先夠力撐起眼皮唔易反

P.S. 點解貼雙眼皮唔試膠水同要剪頭剪尾嗰款？其實我好細個已經試過，仲留下童年陰影！曾用eyetalk膠水令眼皮敏感變到又紅又腫，所以誓死唔再用；而剪頭剪尾嗰款，左右拉完之後條膠紙已經無咩力，痴完上眼仲要剪返多出黎既頭頭尾尾，好驚手震把鉸剪插左入眼或者剪到d睫毛，朝早通常都十下十下，無謂玩命！😂